Мұндай жанрдағы қойылым бұрын-соңды қазақ театрларының сахнасында қойылмаған. Кезекті премьера сонысымен ерекше болмақ.

- «Джудит жасаған қиын таңдау» - бұл отбасының барлық мүшелеріне ерекше көңіл күй сыйлайтын, көрермендерді ұмытылмастай әсерге бөлейтін, ғажайыптар мен ертегі әлеміне апаратын спектакль-шоу. Аймауытов театры үшін бұл қойылымның бір уақытта ересектер мен кішкентай бүлдіршіндерге арналғаны  алғашқы тәжірибе болып отыр,-деп атап өтті қойылым авторы Сергей Левицкий.

Спектакльдің көрнекі және динамикалық құрылымы арқылы қойылым авторлары көрерменге әкелер мен балалардың арасындағы мәңгі таусылмайтын мәселелер, балалар мен ата-аналардың жалғыздық кешуі және кейде өмірдегі ең жақын адамдардың арасында пайда болатын байланыс көпірінің құлдырауы сияқты  мәні-маңызы жоғары құбылыстар жайлы сыр шертеді.

Сергей Левицкий аталған туындының авторы ғана емес, әрі  режиссёр, қоюшы режиссёр, жарық және киім бойынша суретші. Ал пластика режиссёрі – Игорь Григурко.

«Джудит жасаған қиын таңдау» спектаклі биылғы жылдың 26 қарашасы күні сағат 18.30-да сахналады.

Одан арғы күндері - 27 қарашада сағат 13.30-да (қазақ тілінде), 28 қарашада сағат 13.30-да (орыс тілінде) сахналанады.

Баршаңызды театрда күтеміз!